精武風雲‧陳真~

完成德國公幹後，9月12日與小雲前後腳返港（勁似明星怕俾狗仔隊跟蹤二人秘密外遊，實情係未能成功編排相同回程航班而已）。翌日復工下班之際，接獲B&O Michael（B&O係本地影碟製作室，逾半港產影碟都係佢地製作）線報，令柔拔有幸趕及出席《精武風雲‧陳真》優先場，仲笠左D贈品，你吹我唔漲，yeah yeah！

雖然柔拔並非每套甄子丹電影都看過，但此片動作部分真係幕幕似曾相識，幾乎場場戲或佢既舉手投足，都可找到其舊作對號入座「拿，呢幕咪即係果幕囉」；佢個天山黑俠造型又十足李連杰《黑俠》、即將上映既周董《青蜂俠》、甚至《batman》；最爆係佢太刻意扮李小龍演既陳真，搞到虹口道場果段戲好滑稽，佢大叫果句經典對白「中國人唔係東亞病夫」簡直捧腹…

其實陳真根本係虛構人物，如果Donnie做番自己唔扮Bruce，效果或更佳。撇開滑稽武打部分，Donnie演得算有性格，搞不好或可提名最佳男主角。

這是講述中日兩國情仇既商業動作片，與近日發生既釣魚台撞船事件100%天衣無縫，想唔大收都難。