Tuesday, January 27, 2009




情意結~


牛年初一晚與小雲私奔荃灣,走過書報攤買左本八卦婆仔周刊俾小雲仔細閱讀後,她不經意地問我:「點解要睇《Face》」?

估計是因為今期提早出版既《Face》封面太色,惹來了這十萬個為甚麼。

其實這個題目在之前已有N個人問過,其實唔難答,其實只是情意結。

我形容《Face》在傳媒界屬於爛仔,係最爛果隻。但我不諱言興奮向人講,我是從該書一周年左右開始捧場,直至今天逾15年,一期都未停過。更O嘴的是,如無意外,我應該是沒有掉過任何一期(主書)。大家可以想像點解我近幾年係睡廳了吧(對!我訓左客廳幾年,梳化不好,腰骨開始有些痛了…因此如果通頂工作,反而上午可以走入家人的房睡…。)

柔拔曾向行家揚言,現役《Face》既高層,分分鍾都冇我對本書咁老資格啊!《Face》前身《便利》在改名前圓寂果期,行家仲R過我接受訪問,當然沒有應承了。

情意結,記得那年還在暴風少年歲月,同班有件大隻佬同學,非但大隻、更是大佬、多女媾、多LAN、奇怪係仍有求學態度、陸運會總會站上頒獎台、傳聞有「背景」,難怪他懂得尊師重道,部分師長竟也對佢特別禮貌甚至「淆底」,爆!當年仍未習武只以左手傻力行走江湖的柔拔,同佢拗左場手瓜都俾佢輕易KO左。

或許是暴風少年受朋輩影響,柔拔留意佢有睇《便利》習慣(仲有睇《黑豹列傳》,都影響埋我,不過當主筆溫日良另起爐灶導致《黑》易手由其他人畫後,柔拔已冇睇LU),就係咁簡單,我就跟左「佢」十幾年。

其實與大隻佬同學不熟,老實說沒有發展過友情,算係點頭之交吧。我只係羨慕佢的背景,或者以為睇左《便利》可以模彷佢咁威吧hohoho~

呢本出版左十幾年既爛仔書,萬變不離其宗,係走年輕潮人文化。柔拔當然受到此書影響,吾的爛gag詞鋒,不敢獻醜,卻要多謝爛仔書多年教育之恩。老實講,近幾年我都只係求其揭下,叫做留意住年輕潮界吹緊乜風罷了。記得當年在學時有個教授曾公開演說:「《壹周刊》係唔好既,但我地都要睇,要知道而家社會發生緊乜事,就要睇最暢銷果本書,佢係反映緊社會文化價值…」云云(肥佬黎可能曰:「你老母最好!」或者「係唔好都大把人睇,你咬我食,yo!」)

No comments: