Monday, October 20, 2008





葉問~

葉問(1893-1972),被喻為詠春一代宗師。據知嚴詠春(17XX-1XXX)才是詠春先祖,為何葉問叫「一代宗師」,柔拔學識淺薄,不明。有指其美譽源於葉問眾子弟成功把詠春在世界發揚光大。

大家可能對葉問陌生,惟香港人應該鮮有未聞他有個徒兒叫李小龍(1940-1973)。仲有,生於廣東佛山的葉問,於中華人民共和國成立後逃亡香港,並於油麻地繼續私授詠春(據稱政治因素,先祖擔心詠春與反清扯上關係,令詠春子弟遭殃,因此祖訓不可公開傳授詠春,直至葉問徒孫梁挺才「破訓」),簡單說詠春與香港頗有淵源,香港人或對詠春徒徒添親切感。

葉偉信(《葉問》)與王家衛(《一代宗師‧葉問》)都在拍攝「葉問」(均抓來葉問長子葉準做電影顧問)。一度在電影名字上鬧雙胞的此片,最近流出葉偉信版本TRAILER。

睇完TRAILER都令柔拔增加了對詠春之性趣,花掉數小時通宵青春,抓左一些資料,撰blog留念,小雲一定變.\/.。甄子丹本身有武術根底,與葉偉信合作無間(包括《殺破狼》2005、《龍虎門》2006、《導火線》2007),仲有洪金寶武指,期待!最興奮係甄氏都四十幾歲人,佢都仲打得睇得,柔拔相對年輕,仲有大把世界呵呵!

聽聞王家衛既「葉問」梁朝偉為拍此片早年抓葉準習詠春。偉仔鬥子丹,大家點睇?呃…講演技而已,別想得太暴力,死人就唔好啦,影帝喎呵呵。



詠春體育會位於九龍旺角水渠道三號長寧大廈2C室,葉問的兩位兒子葉準及葉正更在上址授課,相信該電影臨近上映的日子,各大小媒體勢必怒煲葉問及詠春,應可吸引一些三分鐘熱度好奇人拜師學藝,估計情況如年初高清肥皂劇《太極》相若。建議有心人早D抓兩老拜學,費事遲左滿額更俾人話跟風冇性格啦!


+++++++++++++++

《葉問》小資料
-出品人:黃百鳴
-導演:葉偉信
-武指:洪金寶
-男主角:甄子丹
-女主角:熊黛林
-顧問:葉準
-投資:逾HK$1億
-香港上映日期:2008年12月19日


《葉問》電影預告片



《葉問》佛山記者招待會



葉問宗師介紹

Tuesday, October 14, 2008






「兒童樂園 ─ 羅冠樵的藝術世界」

專題展覽館〔五〕
2008年7月13日─2009年3月2日

說起《兒童樂園》,你會想到漫畫專欄「小圓圓」,還是「西遊記」呢?你認識當中的幕後功臣羅冠樵嗎?


出 生於1918年的羅冠樵#,中學時代已從師學習中國畫。1938年畢業於廣州市立美術專科學校,主修西洋畫。1947年羅氏移居香港,於1953年創辦《兒 童樂園》*,並同時肩負主編及畫家的身份,是香港早期的插畫家之一。他編繪的漫畫作品風格清新,取材多源自日常生活,體現了當時香港的社會文化及兒童的愛 好。除了以培養孩子良好的品格為目標,他更希望以童心來改變社會,主張藝術應能達到社會教化的功能,以體現「人生的美感」。


羅氏50多年來堅毅創作,藝術生命涉獵的領域十分廣泛,除漫畫外,他一生亦致力推動國畫創作,其作品題材豐富,包括山水、人物、花鳥、動物及書法等。國畫作品中的嶺南兒童題材教人印象深刻,人物描繪細膩生動,表現兒童在鄉間及城市的生活及遊戲。


《兒童樂園》的內容包羅萬有,儼如一本為兒童編撰的百科全書。「兒童樂園 ─羅冠樵的藝術世界」展覽,將參照這部經典兒童刊物的綱目,展示羅氏豐富多樣的藝術作品,讓觀眾在作品之間自由穿梭,從不同角度欣賞羅冠樵的藝術才華,走進他多采多姿的藝術世界。


~~摘自 香港文化博物館

#羅氏今年「9張野」大壽,仍然健在,我覺得真係威喎!

*柔按:《兒童樂園》於1994年停刊。


Monday, October 13, 2008


Krav Maga

Krav Maga,由以色列前國防部格鬥總教練(Chief Instructor of Physical Training in the Israel Defence Forces)Imi Lichtenfeld(1910-1998)創立,被喻為只講實用唔講心性修練既徒手搏擊喎。柔拔抱住知己知彼式心態係咁易往youtube堆抓抓佢D資料,真係估佢唔到,呢條教人徒手制服槍手既短片竟然有逾百萬點擊率!!!

喂老老實實喇,如果我渣得短槍搵食,梗係為食大茶飯啦,你估為興趣打war game咩!我若淪落至要渣短槍抓食,首先一定射穿你雙膝等你走唔甩(even你舉起雙手扮饒命都照怒射可也),唔通俾位等你侍機還拖咩笨實!出來行梗係速戰速決啦老細!


大家有興趣可以CLICK入去仔細研究,片長3:37 >>  Krav Maga



柔拔傳媒血

不過咁,早在課堂買賣之前,6、7歲人仔的我已經培養左在家裡畫公仔出版家庭式雜誌予家人及同學傳閱,仲「要求」家人及同學寫信,然後自己扮「老總」回覆。回想起來,我真係天生傳媒血。當年影響我既包括:《星島好兒童》、《兒童樂園》、《成語動畫廊》、《老夫子》、《突破少年》、《天天日報》等。

最記得有次媽子不肯買《星島好兒童》,柔拔幾歲人仔問媽子拎大餅膽粗粗自己落報紙檔買,都幾驚架當時。又有一次同媽子一齊往報攤買,媽子同聽緊跑馬直播收音機既老闆娘擾攘左一陣轉身告訴我冇書買,我問點解老闆娘好似想食人咁態度,媽子說老闆娘跑馬中唔能鍾意聽個書(輸)字喎。上述書報幾乎都已壽終正寢執Q哂,往事只能回味。


5個大餅賣郵票

話說回來,我可是記得在小學時候,曾偷偷地拿了屋企餅乾返學校賣(非法乎?);又由於家父昔日是國際性航海員(好高級果隻,我覺得真係威喎),周遊列國之餘不忘寄下信回家,小拔就儲埋好多不同國藉既郵票,結果就拎左唔少返學校上課時與同學仔交易,當中有barter有真金白銀,最勁果次係賣左5個大餅!5個大餅喎!那是二十年多前的事了!5個大餅,注意我係零成本剪左老豆封信既郵票交易,我好似係JEL住頭印印腳咬住雪茄味脆皮同富貴同學仔傾架單生意,開心到丫~~


灰爆!尹思哲~~

理財向來是柔拔的弱項,做左咁多年人總是對「商」字提不起性趣。只是由於受到家人影響,向來都有睇財經版習慣。不過真係財經果批內容通常都睇到滿腦子問號,揭左就算,反正financial planner上半生有家人,下半生有小雲,儲大餅既事老子真係好少理。

真正叫我追財版既原因,係裡面有個叫「案內人隨筆」既專欄。唔知係咪為左與眾(其他專欄主筆)不同,思哲除左都有講財經之餘,更主打科技範疇。因此睇到任職科技傳媒既柔拔裸膽咁興奮,試過投入到在其網誌留言。少少仰慕,好想見其真身。曾向「蘋果」行家打探,卻總是抓不出此人。

「尹思哲」反映明星效應對傳媒的正面作用,柔拔被思哲吸引,閱讀本無性趣的財版。 讀者會跟作者走,柔拔會跟思哲走。這也解釋了為何守舊大公司不敢將麾下記者明星化。惟在互聯網時代,記者明星化是禁不了的大方向。有緣再論。


「思哲」唔撚係人
言歸正傳。我好歹是個media worker,好奇心是這類人的天性。死心不息抓思哲,竟然在前天俾我……發現左真相………「尹思哲」原來是「集體創作」,是一群人的共享筆名,怪不得像通曉天地事…已經是年多前被網友篤爆…拒露眉丫……灰爆!

就係咁,睇「案內人隨筆」既性趣突然跌至谷底,拿起報章有種男人最怕的提不起勁感覺,灰爆!而家已經係昅下大小標題就算,正物色其他有內容有真身既相若資訊,費事SIDE時間。

此事反映柔拔既價值觀,內容重要,創作內容果個都重要。唔知係乜水做既,幾有內涵最終都無感情可言。情況類似哨牙度(前世界足球先生Ronaldo)召妓後發現條女原來係人妖!一係誠實,一係騙一世就唔駛咁核突…灰。

Sunday, October 12, 2008




romantic love ~


"真正海枯石爛的情愛,不是穿一樣的情侶裝,而是一對情人共用一個身份證號碼。"

有聊在網上抓到的一句說話,好似好有insight~~

不過咁樣會唔會侵犯人既私隱架?

而家個人主義當道,句子會唔會不合時宜?

如果「佔有慾」仍然是人類本性,應該唔會。


若把句子套用經濟學邏輯論(if A, then B / 雨雲論),咁樣:
共用身分證,唔一定海枯石爛;
不共用身分證,就肯定唔係海枯石爛添啦。