游龍戲鳳~~

大牛初一，柔拔做左個突破，第一次與父母及小雲「齊腳組合」走入戲院睇戲。看的是《游龍戲鳳》。

因為是儲積分贈送的免費票，加上全新fresh「齊腳組合」，即使該片原非柔拔意願，看起來也特別開心。

雖然是免費，卻在年廿八晚走去排隊預留座位了。還記得那夜小凍，柔拔與戰友阿SA姐姐（其實是個男的, 改個女人名，對大男人柔拔而言，難接受矣）一起到戲院想話訂左位再共晉晚膳，豈料遇上「經濟復甦」，果條預售門票人龍由商場排到出街，天寒地凍都咁多人排，柔拔再再再重申（因在同儕間已說了多遍），我真係毛髮相信香港人受到金融海嘯折磨，同埋一些關於「近年電影業錢途不景氣」之說。

最爆係排到我果陣，年廿八BOOK大牛初一既《游龍戲鳳》，竟然已幾乎全院滿座；惟有退而求其次BOOK同日既11點早場。仲記得受到今次「經濟復甦」拖累，戰友阿SA姐姐遲左返公司報到而被上司埋怨，很抱歉；幸柔拔效力的媒體人間有情，最終沒事，很安慰。

睇戲果日，由於家母與小雲都屬on time派系，因此帶挈埋delay no more掌門人柔拔都變左早到，上午11點準時入場，周圍仍冇乜人，但其實個早場係almost full house的，結果係睇左半粒鐘都仲有人電筒帶位。柔拔回憶著英倫生活條條老外都早起的日子，暗唸「香港人…唉…」

對套電影真係冇乜感覺，本身非劉華迷，也承認對港產片質素有微言，仲有係一心想著港產片影碟好便宜好快網上有得睇公仔箱有得翻綽之類…卻兌現左「不帶寄望，就有希望」，係有些驚喜的。

此片在澳門取景，柔拔上次去澳門約半年前的盛夏，對「馬交」既感覺係小雲香汗淋漓，但睇番套片拍出來卻是人靚景靚，賞心悅目。電影永遠把最好一面展現人前，電影只是商品，是媒體，不是傳媒。

戲情就非常老套，三條主線：有錢男與窮家女（劉華/ 舒淇）、有錢女與貧賤男（Hocc/張涵予）、王老五與失婚媽媽（林嘉華/張歆藝），開首場戲還以為佢係抄《Chicago》歌劇添。賀歲片唔講深度，但求笑番餐飽場面華麗即可。

個人最讚係Hocc，加埋舒淇及官恩娜，總算不失色香潮味。散場後師奶乙在比較《游龍戲鳳》與《嚦咕嚦咕新年財》（2002, 導演杜琪峰及韋家輝, 主演劉華、劉青雲、梁詠琪、應采兒），柔拔在看《游》時卻一直在幻想把劉華變黎明，然後又常常回憶著《玻璃之城》及《一見鍾情》…

免費票原先係想陪家人睇《The day the earth stood still（地球停轉日）》 ，後來想改《家有囍事2009》，都係旨在想俾鮮入戲院的父母開心下，小雲更提議《梅蘭芳》，最後爆冷由拔母扑鎚下令睇《游》。

大牛檔期前後不下十多部電影上映，柔拔估計《赤壁決戰天下》最有叫座力，且看結算如何。